隨想

(一)

四川的新聞, 每天都叫人哀慟.

成千上萬可能成為孤兒的孩子, 無助、徬徨, 每天期盼奇蹟, 期盼家人無恙接自己回去, 一家團聚.

無論遠近, 好多人都異口同聲, 希望助養這群孩子, 給他們一點經濟上、精神上的支持, 培育他們成人.

看朋友的網誌, 都提到中國一孩政策下, 中年夫婦失去孩兒的悲痛.

忽發奇想, 如果由這些夫婦領養孤兒, 會不會是一個可行的方法?

我們身處香港, 鞭長莫及, 能做的, 只有捐錢助養.

然而弱小心靈, 也需要大人的陪伴、心靈的慰藉.

痛失孩子的父母, 亦需要別人的撫慰.

一同經歷過災難, 幸保生命, 或可相濡以沫, 彌補少許生命的遺憾?!


(二)

從來不知道三少會寫詩.

記憶中, 沒見過三少的詩作.

打開bloglines, 看到三少網誌有更新.

題目甚有詩意:《木棉花忽然漫天飛舞》.

click開來看, 有點傻了眼, O了咀.

竟是一篇詩!

抒發三少對四川地震的感受.

看完, 更加肯定當年三少選擇理科是浪費了一支好筆.

德國版《風雲歲月》

今年似乎與德國很有緣. 先是三少公費到德國進修一星期, 繼而有同事單人匹馬歐遊德國天鵝堡.

我呢, 竟然找到一套德國長劇看!!


事緣某日閒逛HMV, 例牌必到電視劇架上瀏覽. 見有此新戲上架, 一看封面紅色中文label:《風雲歲月》?? 頓時吸引閒人目光.

描述寫到好似好勁, 製作費最昂貴, 收視破紀錄, 係美國定英國戲呢? 睇真d, 都不是, 竟然是德國呀大佬!!

之前聽三少講, 德國電視台拍劇比敝台更誇張. 敝台兩日半拍一集已經俾人鬧粗製濫造, 人家一日拍一集呀!! 所有廠景一次過搭晒, 左右開弓: 一邊是客廳飯廳睡房景, 另一邊可以餐廳辦公室. 我話, 同拍sit com差唔多喎.

well, 身為一個長劇專才, 見到長劇, 幾乎飛身撲埋去. 三少再三告誡: 你會唔會睇架?

結果, 我昨天一次過煲晒. 幸好只是三集, 每集個半鐘, 嚴格講, 這是一套長篇電視電影.

故事講乜呢? 其實係講一個賣咖啡的家族權力鬥爭. 故仔一開始就講個咖啡大王飛機失事死左, 一向不理公司事務的遺孀突然被稅局追討欠稅, 話佢同佢死鬼老公串謀盜用公款4000萬歐羅, 兼且瞞稅及逃稅, 迫遺孀交還千幾萬稅款. 遺孀被迫參予公司事務, 追查真相, 跟住就牽涉入公司的權力鬥爭. 即係成班家族成員鬼打鬼, 互相勾心鬥角.

追查真相的過程中, 遺孀識左一個咖啡商, 兩個人無論生意上及感情上都非常合拍, 但慢慢遺孀發現呢條友仔知好多野, 對佢又愛又猜疑. 遺孀自己又有酗酒習慣, 因而不得親生仔女的支持, 成日都處於孤立無援的境地.

成個格局都好tvb, 但係拍得好認真, 好好睇. 好多都係用實景拍, 好出到上流社會的感覺. 而且仲去埋肯尼亞、馬爾他、紐約等地拍外景, 完全係tvb拍大型長劇的一貫做法, 所以睇落真係好有親切感.

我比較鍾意故仔的前置部份, 即係人物背景的setup, 好多想像空間. 而且遺孀同佢亡夫的關係設計得幾新鮮, 有少少估佢唔到. 仲有家族成員之間的關係, 遺孀同幾個仔女的關係 (部份係親生, 部份係亡夫同前妻生), 遺孀同公司班元老的關係... 都仲有好多空間可以寫. 只要將咖啡改為茶葉, 又可以是另一齣tvb重頭長劇.

呢套戲有好多細位都做得好仔細. 好似講個遺孀酗酒. 人家真是出到酒鬼感覺, 有時不用佢拿住樽酒係咁對, 而係煩惱時候, 望到眼前的一堆酒, 心動, 好想飲, 但又理智按捺自己, 內心掙扎, 好痛苦, 完全明白點解佢要酗酒. 同埋人地飲都飲得自然過人, 絕對不是《銀樓金粉》伍小姐那種作狀演繹, 實在好難睇.

仲有一場, 講遺孀醉酒街頭, 俾元老執左返屋企, 第二朝醒左落樓見人, 要扭番正條裙...我睇到呢度簡直嘩一聲, 大家有幾何睇到戲裡角色醒後是頭髮蓬鬆、衣衫不整? 全部都企企理理, 假到不堪.

另外, 唔睇唔知, 原來德國佬都有浪漫同幽默的一面. 有一場, 講咖啡商想約會遺孀慘食檸檬後, 竟然按不住思念, 深夜抱住一大紮玫瑰上門, 遺孀一個反應, 跟住兩個人就在廚房邊整野食邊傾偈. 臨走, 遺孀將成紮玫瑰交番俾佢, 話幫佢保管完紮花, 婉轉拒愛. 寫得好優雅舒服, 兩個中年人談戀愛完全不覺突兀.

呢套戲的演員我一個都唔識, 但睇得出全都係好戲之人. 如果換做香港演員, 我會提議鄧萃雯, 男主角----好難諗, 要一個有少少型、有幽默感, 但又俾人摸唔透的賭徒feel, 三哥太正氣, 馬生只識放電, 我只係諗到謝天華.

至於飾演遺孀老爺的都要一個壓得場的演員, 不知怎地, 常常浮起鮑方叔的影子. 在我心目中, 他是一等一的老戲骨. 如今有份量的老戲骨買少見少, 如果秋官願意的話, 佢做都幾恰當 (不過到時一定要大加老爺戲份, 個戲就變成另一個樣子了).

有同事鍾意《華麗一族》, 講生意講借貸, 講得好真實. 咁我會推薦佢睇呢套. 生意世界更加真實. 講陰謀講關係, 更加血肉模糊. 同樣有老豆要前越祖先成就的情意結. 劇本夠爽, 對白夠絕, 不像《華》劇, 有時真有種死拖爛拖的感覺.

完稿前後

完稿前

1. 每日準時收看一點鐘《午間新聞》, 六點鐘《大長今》, 六點半《晚間新聞》, 星期二及四的《星期二檔案》、《新聞透視》. 星期一晚《舞動奇迹第二季》(胡定欣的表演實在亮眼, 很想知道她跟謝天華合作會有什麼火花)...

2. 至於《原來愛上賊》, 本來花了一整天時間已經追回早前開夜看不到的集數, 每晚好好的邊看邊吃飯. 但星期一晚, 三少姐姐及姐夫因要到澳門三天, 把葉靈b交托給外婆湊之後, 每晚大家的注視點都在小傢伙身上, 奶奶又忙著報告小傢伙的日間活動, 吵吵鬧鬧, 沒法安安靜靜的看電視. 幸好我全都錄起了.

3. 星期日及星期一分別為兩家母親慶祝母親節. 都寫不到稿了...

4. 星期一的四川大地震, 呆了. 星期二想去捐款, 好像大家剛放完假返工, 慈善機構還沒開動捐款戶口, 直至下午才陸續有捐款方法宣佈.

5. 偷懶看了《盜海豪情3》, 不及第二集好看. 人太多, 阿爾柏仙奴不過擺個奸臉出來就成, 好像成了個明星湊高興自娛的party.

6. 擺出趕稿這個大藉口, 家務丟著不管...


完稿後

1. 第一時間把分場撕掉...(好狠!!)

2. 好像有好多功夫要做...換床單、換枕套、執拾衣櫃, 還有滿瀉的購物袋、雜誌, 繳交各項雜費, 吸塵, 整理書桌, 儘快清理囤積的美容品、書本... 結果, 只是拿了棉胎去焗, 收進儲藏箱, 即便收工.

3. 到銀行捐款給紅十字會.

4. 無所事事般, 待在快餐店吃完我的brunchea, 慢慢翻雜誌. 離開時才驚覺已坐了個多小時!

5. 可能因為每天都在看地震新聞, 心情並不怎麼輕鬆.

6. 昨夜還睡得不好. 輾轉一番後才能入睡, 朝早六點半醒過, 幾乎有不能再睡的情況. 勉強自己合上雙眼再睡, 之後每個鐘頭再醒一次...可惡! 本小姐乃有名睡寶, 不待此時睡飽更待何時, 卻竟有失眠之危機!!

7. 好想購物, 跟著轉念一想, 其實也沒什麼需要, 還是省下來捐出去好了.

8. 又坐在電腦前, 唏哩嘩啦雜七雜八的打了這篇廢話. 就當是完稿後的情緒抒發吧.

懷念 蕭顯輝

早陣子, 同事間口耳相傳, 說蕭公子走了.

蕭公子? 部分同事的第一反應是同為編劇組的蕭公子. 然而我與他不相熟, 所以腦海浮起的是另一位蕭公子.

事實上, 主角也是我所熟悉的蕭公子----監製蕭顯輝.

說來也是緣份. 他是我跟三少談及tvb時的共同話題之一.

當年三少曾在此台做過一陣子助導, 曾經參與過蕭監製的劇集.

後來他跳槽去了. 未幾, 輪到我入來.

第一部就是蕭監製的《花木蘭》.

初來步到, 如同一舊雲. 蕭監製卻是和藹可親, 隨和待人, 不時請下午茶, 十分好人. 讓我誤以為監製都是有義務請下午茶.

後來公司人事架構改組, 我也沒再跟他合作.

早幾年公司再度出現人事問題, 他被迫退休.

從一些他友好的同事口中, 偶爾聽到他的近況. 但我也沒怎麼上心, 知道了便算.

直至收到他的死訊, 才得悉他之前曾經患癌, 大步檻過醫好了, 沒想到在家中跌倒, 失救而死.

大家都唏噓, 命運弄人啊!

曾經拜托過同事, 舉行儀式時通知一聲, 好盡點心意.

結果, 這位同事不知是傷心過度, 還是不想煩擾我們, 一直沒有消息.

這兩天看報紙, 才知儀式舉行了.

沒法子, 唯有在這裡寫下小小的心意.

願他一路好走. 我會永遠記得你這位好人.