學中文

到樓下餐廳吃brunchea(即breakfast+lunch+tea), 聽到鄰座三母女的談話如下.

母: (向小女兒, 約九、十歲) d文言文有幾難呀, 得閒睇多d小說啦. 好似《射鵰英雄傳》、《天龍八部》咁, 學多d中文.
小女兒: 咁睇《一公升的眼淚》得唔得?
母: 邊度得架. 睇三毛、嚴沁、瓊瑤都好, 不過d愛情小說唔好學d愛情, 學佢地d文筆. 佢地係台灣人, 台灣人d文筆好好架.
小女兒: 《一公升的眼淚》好感人架.
母: 睇倪匡都好, 佢有本講地底, 好得人驚架. 再唔係睇赤村次郎, 推理小說...
(我聽到心下一驚: 唔係嘛, 你叫個女學中文, 叫佢睇倪匡?! 赤村次郎都要睇邊個翻譯啦...)
小女兒: 推理小說要用腦嘅...
母: 冰心都好.
小女兒: 課本有得讀, 不過都唔知佢講乜.
大女兒(約十三、四歲): 我個補習姐姐都無睇過《紅樓夢》. 無人知個故仔講乜.
母: 《紅樓夢》好悶嘅, 睇戲好睇d...
小女兒: 我想睇《受難曲》. 好感人架.
母: 《受難曲》?! 乜鬼唻架?! (小女兒補充: 講耶穌架.) 唏, 聖誕睇乜《受難曲》, 復活節先睇架嘛!
(啊!!原來睇戲同食物一樣, 要講當唔當造的.)
大女兒: 聖誕梗係睇《聖誕頌》啦.
母: 又係講耶穌架?! 不過啱聖誕睇d, 唔好睇《受難曲》啦.
小女兒: 我想睇《多啦A夢》.
母: 噓, 你仲細咩!!
跟著話題轉到食物遲遲未上...

心感慨嘆, 教兒育女, 真不容易.