曾經一度是Bobbi Brown的愛用者。
2009年推出的Skin Foundation，一用傾心，號稱20秒上妝，絕非得個講字，確實做到快、貼、薄，兼且保濕與控油做得十分平衡，堪稱我用過最完美的粉底液。
然後呢，給Chanel的粉餅擄走了。
直至近來Bobbi Brown大推這支Even Finish Foundation，那條宣傳短片，說是做完運動流完汗都仲keep到個妝！
即係話，夏日艷陽高照，汗流浹背，都可以保到個妝？
好似幾好，拿拿臨上網做功課，口碑都算是不俗。
本來諗過買Chanel的perfection lumiere，但是防曬只得SPF 10，價錢又貴少少（其實不過差廿蚊！），就轉軚了！
本來只係買粉底，遇著勁熱心的BA，揀下揀下就咁大堆頭。
其實係好肉赤，但係得到三少一句評語，立即覺得物有所值！
評語係乜？遲下至講。先睇敗家戰績。
所謂打靚個底，BA推介，這瓶Gel Cream，保濕打底一take過，可以省回平日的面霜。
另有防曬版，但經驗所得，越多功能越得個桔。目標為本是最好。
而且粉底有防曬，唔夠的話再加多層SPF 50的防曬霜，橫豎家裡大把貨。
有保護膠膜，還很貼心的設計揭蓋位，不怕沾到一手都係。
貌似cream，一點也不油，很輕，很易推開，一推就覺得水水的，感覺充滿水份。近來都用它代替面霜，清爽，不俗。
主角，泵裝設計，方便衛生。
不同其他主打夏天控油的粉底，這支粉底營造的效果是偏向光澤感，並不是啞緻妝容。
妝感算透薄，遮瑕度不太高，近來暗瘡狂發，可以遮到七成紅印，加少少遮瑕膏就perfect。
BA說法，這支粉底係gel base，即使流汗，印走了油份和汗水，顏色粒子依然會貼在臉上，達到不脫妝效果。
完全不脫妝當然無可能，但在近日30度高溫，沒開冷氣捱足6個鐘的情況下，印完汗，都只係印出少少顏色，依然keep到好面色，算係唔錯。
不過呢，碎粉一定要加，for定妝又好，控油又好，都是少不了。幸好，家中又是大把碎粉存貨，閃同唔閃都有齊，視乎當天什麼心情再配搭。
BA起初給我試2號色（sand），自然偏白，美肌靚色。但是我過了夏天都會黑少少，揀隻深一度。現在用，其實都好吻合膚色，完全融晒入去。
平時習慣手指上粉，不過BA話會厚，教我用這支粉底刷，的確薄貼了。
得她指導，才知道用刷不能把掃頭打平，會壓出粉痕，要以接近90度直角方式拖開，果然效果大不同！
洗掃spray。家裡已有一支Bobbi Brown的洗掃液，BA話那支是「大洗」用，一個月用一次即可。
這支係平日乾洗用，每天刷完粉底，以紙巾墊底，直接噴在粉底掃上，跟著紙巾包住抹，就可以洗甩顏色。如果係其他毛掃，就先噴在紙巾上再包住掃毛抹。
最方便係不用過水，乾洗完，稍為擱置一會自然風乾，就可以收入櫃或刷其他膏狀妝品。
簡直係為吾等懶人設計，無慮即買！
改良版睫毛夾，說是適合亞洲人眼型。
BA教貼著睫毛根部夾，不用分3次夾鬈，俾少少力夾個20秒就可以，睫毛會變得又鬈又翹。
親身試過，當然無佢講得誇張，不過翹得幾自然。
除附有兩條替換膠帶，還有個小布袋，立即加分！（雖則羊毛都係出自羊身上）
Long-Wear系列另一主打︰眼線膠筆
家中已有黑、啡、紫，於是揀了支墨綠色。
Bobbi Brown的眼線膠出晒名，持久，但使用不便，一定要用掃。現在改成筆狀，同樣持久，畫上眼等10秒，就會貼實眼皮云云。
真人實證，這支其實都會溶少少，可接受程度啦，跟Chanel的waterproof眼線筆差不多，即係一定要加眼影粉定妝。
眼影膏，家中有罐Chanel的，超愛用，無想過再添一員，但一試色，立時投降！個色真係超。靚！
玻璃瓶身，顏色一目了然。
眼影膏加眼線筆。
好喜歡那淡淡的金啡色，又有些許紫銅閃粉，擦在眼皮上，微微閃，立即有神，又唔覺有顏色。化妝最鍾意玩「你睇我唔到」，即係化左都唔覺化左。
BA推介埋支睫毛膏，微細刷頭專給亞洲人用。又係持久型，溫水可卸。
其實呢，我已甚少擦睫毛膏，好傷睫毛呀，次次卸妝都甩，心痛程度媲美男人脫髮！
我都唔知點解會買埋，可能買得太多，已迷失理智。
送贈卸妝油試用裝。以前用過貨裝，麻麻地，我用完有少少敏感，不過細細包，帶去旅行都好。
之前提過，因為三少一句評語，肉赤變物有所值。
話說買完咁多新玩具，立即試玩，粉底連眼妝全上，三少不知，只說覺得我當日面色好左、精神左！問我係咪之前一晚睡得好？嘩，我立時偷笑，肉痛感消失殆盡！呢套玩具，抵玩呀！XDDD
【延伸參考】
官網︰Bobbi Brown Hong Kong
Facebook專頁︰Bobbi Brown Cosmetics Hong Kong
沒有留言:
發佈留言