人呢，到某個年紀，無論點勤力保養，膚質都係無後生時咁靚，點都要搽少少遮下斑，提亮下膚色。但係人性本懶，朝朝搽完base、搽濕粉、遮瑕、撻碎粉，工序何其多，即使用2-way cake簡化程序，用得幾日又要洗粉樸，真係正所謂，懶得一時唔懶得一世。
幸好近年盛行BB Cream、CC Cream，有番咁上下修飾功能，又可以薄薄一層，身邊人唔會抱怨你又戴面具出街，而且工序減省快點出門，也有助減低身邊人的嚕嗦。
所以呢，我又買野啦，不過今次唔係BB Cream、CC Cream，而係佢地喺歐美的姊妹"Tinted Moisturizer"。
Chantecaille係法國品牌，用料精良不濫出產品，享譽國際，好多人都知。特別係佢地的粉底Future Skin，好多人都讚。而我身邊亦有人用過佢地的碎粉掃，讚不絕口，深植我腦中。不過用料好價錢當然唔平，而且手邊不乏玩具可玩，深恐買了回來都係束諸高閣，所以我對佢一直都係可望而不可即，總係猶豫卻步，與counter擦身而過就算。
直至某次行經銅鑼灣連卡佛（海港城連卡佛感覺好恐怖，唔單止係人多，而係每個counter都對你虎視眈眈，好像入了獅子籠咁），一時衝動，走埋去counter，就此開始了我同Chantecaille的結緣。
先講支tinted moisturizer，名為"Just Skin"，即係，「剛剛好似你層皮咁」，哈哈。簡單講，係有少少修飾功效的潤色霜，遮瑕度唔高，不過可以均勻膚色，而且有15度防曬，基本上都OK啦。講真，有邊個女仔唔會搽高度數防曬打底？所以SPF 15係輔助多於真正用來防曬。
我算係白人，偏好自然膚色，平時買粉底色號都係中間偏白，所以BA配了vanilla色給我。看相，擦手背都好自然不厚重。
至於保濕控油方面，因為剛入手，未試得真。BA就話夏天用都無問題，有控油成份云云，聽住先啦。總之都係果句，自己做好保濕打底，保養唔好靠底妝產品。
產品設計係管裝尖咀，用量好易控制。雖然索價$670，但係有50g，平均$13.6/1g，其實同其他30ml的產品比係差唔多，唔算特別貴（當然，同韓牌的抵食夾大件真係無得比）。
上了BB Cream、CC Cream都要掃番層碎粉，始終液／膏狀產品比較濕黏，出街會黐塵，自己感覺也不太好。呢支碎粉掃，將碎粉同掃二合為一，帶出街去旅行都得，唔怕碎粉飛散。最佳設計係，個掃頭可以拆開，方便清洗，或者更換補充裝，唔駛次次買支全新，感覺上比較環保同抵用。
最神奇係，支碎粉掃有SPF 46 PA+++，勁過Just Skin好多！不過又係果句，因為薄掃一層，防曬度係會打折，都係做好防曬打底至用佢，或者唔搽Just Skin or其他粉底，齋用佢on top在防曬上都得，特別係青春少艾皮膚無敵靚，何必用咁多產品層層疊呢，簡單就是美呀！
呢支計起上來會比較貴，只得2.5g，比起那些一罐有10g以上的，係無咁抵用，但係買了第一次，以後就可以齋買補充裝替換，睇在有埋支掃兼方便帶出街份上，點都要買支傍身。
Just Skin+碎粉掃效果，望落都幾均勻吖，又遮到少少血管，趕住出門，或者落街買野，用呢個孖寶組合就夠，3分鐘就有好氣色，真係輕鬆出門無難度。
少少題外話，其實好搞笑，兩件婆特我係唔同時間唔同地方買。碎粉掃係喺Chantecaille的counter買，Just Skin就係後來在Joyce Beauty買，剛巧兩次都入了會做會員，所以可以順便比較下兩邊的會員制。
Joyce Beauty買野，一元消費等於一分積分，一年（由入會日起計）累積超過$4000即係4000積分，就可以換$100回贈，換言之，40分換$1。
Chantecaille亦係一元消費等於一分積分，累計$5000即係5000分，就回贈$150，即係33.33分換$1。
如果唔止買Chantecaille，無疑Joyce Beauty係比較方便，而且儲5000分也不太易，除非全線都用Chantecaille就可以好快儲到。各有優勝之處，視乎各人的購物習慣及愛好啦。
Chantecaille官網：www.Chantecaille.com
Joyce Beauty官網：www.joyce.com/beauty/
沒有留言:
發佈留言