我的低能心聲

呵呵呵, 日日在屋企坐唔安食唔落, 就係想撲去書展買馬仔新作.

巡完一號館, 買了新書, 跟住上去三號館找精品.

本來那些匙扣和電話繩都好靚, 但係我驚刮花部電話, 所以唔買了. 其他好像沒什麼特別.

看檔阿姐推介, 呢個枕頭仔好呀, 可以瞓晏覺墊住個頭, 好多人買架.

瞓晏覺? 咪係馬仔做OL時的看家本領囉! 諗起就覺得好笑, 跟住看它size大小適中, 剛好用來墊腰寫稿. 雖則要100大元, 比起另一款四方cushion貴.

但係呢個有馬仔瞓晏覺個樣, 看著都不自覺代入左, 好爽! 好, 豪一豪佢! (仲有另一款粉紅色, 係馬仔做facial的公仔, 好romantic架)

********************************

唔知點解, 呢排才突然發現馬仔咁好睇.

逛書局是鄙人日常shopping指定項目之一, 去年早已留意到馬仔的兩本低能系列, 不過當作是一本繪本, 沒有上心.

後來她出版了《我們的低能婚禮》. 一揭內容, 好有共鳴呀!


不過在書局打書釘看完就算, 沒買.

**********************************

早兩個星期, 雜誌地鐵廣告, 鋪天蓋地的宣傳書展.

天地的重點推介新書, 是馬仔的《我的低能旅行》和《我的低能大肚之道》.

對於恨生仔的我唻講, 「大肚」兩個字, 異常吸引.

未去得書展之前, 上網睇下料啦. 無端端去左馬仔個網頁《馬仔市集》

睇下佢個blog, 睇下睇下, 覺得好開心.

呢個女仔真係好樂觀, 寫的盡是開心事.

跟住就好想睇番佢的前作.

一睇, 不得了, 簡直迷上了!

**********************************

去書展, 第一時間買新書.

都未等得切返屋企, 坐在場館外的長椅休息, 已經急不及待拎出來翻閱.


真係好好笑, 仲好有共鳴...

雖則我仲未大肚, 但係佢講到因為婦科問題, 中西醫都建議佢儘快懷孕, 於是就要當自己有左咁, 好多野都唔食得, 生冷、海鮮係頭號禁忌.

為了生bb, 養好身子, 我已經戒左生冷野成兩年幾!

嗚嗚嗚, 凍飲我仲可以忍, 但係雲呢拿雪糕係我的至愛之一, 一到夏天就特別想食...無得食, 好慘.

跟住睇到馬仔話每個月姨媽到, 就會晌果幾日放肆大食生冷野, 簡直講中晒我的心聲!

就係果幾日才是放監的日子, 可以去食魚生壽司, 仲可以食雪糕.

但係呢幾日往往一閃即逝, 把握唔到, 就要乖乖返入監倉, 等下個月再定生死...

呢樣野, 恐怕連三少都唔察覺. 如果唔係, 佢應該每個月都帶我食一次壽司!

所以呢, 而家個個月都望快d中, 咁生完bb就可以回復自由, 唔駛無了期咁等落去...

等待係最磨人的事, 仲要一等, 就等左兩年零三個月!

唉, 好羨慕有d人, 話有就有.

呢世人, 最怕無把握的事, 即使去街, 我都會上網查定地圖, 確保自己搭岩車唔會行錯路.

偏偏生仔係最不可能把握, 文獻指出, 女性自然成功受孕的機會, 一般係15-20%.

仲未計年齡體質遺傳等因素.

所以話, bb係天賜, 一d都無講錯. 真係有就有, 無就無.

終於明白, 點解老人家成日叫人「有仔趁嫩生」.