有關旅行的二三事

1. 剛剛旅行完回來, 一開電郵, 給某買家罵個賊死, 幾乎要報警告我騙財. 我一直以為在電郵中已通知他/她, 我會離港數天. 沒料到翻看紀錄, 沒有! 查看日子, 原來拍賣早於月中已結束, 他/她卻一直遲遲不付款, 我以為拉倒了, 所以沒通知他/她. 也不知錯在哪個? 算了吧, 香港地, 顧客永遠是對的, 就算我再解釋還是會被罵, 只好猛說不好意思, 事忙未及通知blablabla...

2. 到布吉旅行是忽發奇想的地點, 原本打算再到我愛的台北, 不記得看到什麼聽到什麼, 總之就是有人提到布吉, 心裡一動, 陽光與海灘, 三少應該很開心, 就跟他說, 去布吉吧.

3. 去布吉, 去過沒去過的, 都說自由行便好. 到旅行社拿package資料, 順道拿點旅行團介紹, 看看有什麼景點好去. 再三比較, 發覺很多團都很hea, 很多自由活動時間, 和三少到旅行社問, 職員推介跟團, 因為交通費貴.

4. 去過後, 發現職員沒說錯, 除非你打算五日四夜一直留在酒店, 否則都是跟團好. 試換算一下, 現在港元跟泰幣兌4.1, 坐一程篤篤(嚴格說是的士, 都是紅色車身), 從酒店(我們住karon的movenpick--挺不錯)到芭東, 十來二十分鐘車程, 要350銖, 即是港幣85蚊!! 香港坐的士都唔駛咁貴. 再計一下, 無論你到布吉市中心行商場, 到芭東, 都是這個價錢, 你仲想唔想踏出酒店門口?!

5. 我地跟的團好神奇. 出發前旅行社通知我們, 因為收唔足15人, 只得10人, 所以沒有隨團領隊, 只有另一團布吉的領隊在機場幫我地搞check-in, 跟住去到布吉就只有導遊. 第一次跟沒有領隊的小團.

6. 到左當地, 我地才發現, 原來另外8個人是一伙, 換言之, 如果我地唔報呢個團, 呢8個人等同包團.

7. 幸好呢班都係好爽直, 同我地年紀差不多的"後生仔", 對我地好照顧, 有乜都預埋我地一份, 都幾開心架.

8. 最神奇係導遊同司機. 導遊成個龍剛咁款, 紮住條馬尾, 黑黑實實, 鋼條身形, 時不時有陣煙味, 成個黑社會/釋囚. 司機仲奇怪, 載左我地兩日, 跟住話架旅遊巴要整, 第三日換左部van仔唻. 十個人剛剛坐晒, 更加有包團feel.

9. 第四日係自由活動, 沒車提供, 要我地自己包車. 咁我地商量好, 包了一程車去商場行街shopping, 下午訂了spa, 有專車接送, 慳了兩程車. 夜晚在芭東食海鮮, 食完十個人一齊坐篤篤返酒店. 10個人分350銖, 係咪抵過2個人分350銖? 所以不要再做傻仔啦, 去乜自由行丫, 布吉好多團都好多自由活動時間, 想去邊都得啦. 跟團又包你去乜島物島, 好過join local tour, 跟一班鬼佬同個講英文的導遊, 煩到死!

10. 呢個導遊都唔知係咪見我地得10個人, 介紹我地去攀牙灣, 去激流, 講左三次都無人應, 無心機帶團. 星期日係佛誕, 居然都唔記得, 唔提下我地, 等我地去到芭東, 見好多舖都唔開, 仲以為當晚下大雨所以無人開舖(大家都知泰國人幾hea, 尤其布吉島, 賺錢多過曼谷同芭堤雅, 真係唔做都唔駛憂).

11. 呢個團仲有d神奇野, 就係bonus行程參觀警署. 話說有團友不小心丟了鑽石耳環, 鑽石喎, 唔報警, 保險唔賠. 於是大家就一車去左警署. 當然我地唔會入去咁擾攘啦, 龍剛導遊就叫我地過對面街間舖仔行下. 原來是賣制服賣手槍賣徽章...總之有關警察的物品都有得賣. 仲有四隻好可愛的鬈毛貴婦狗仔在你腳邊氹氹轉.

12. 上次高雄之旅寫左個開頭就無時間寫埋落去. 今次睇下有無時間, 寫個簡易版布吉五天之旅先. 講下間靚酒店都好.

13. 旅程中三少開懷購物, 買了不少心頭好. 我就無乜大意慾, 怕自己一時衝動, 買返唻用唔夠三次就唔好. 不過到最後一日參觀珠寶廠, 本來也沒打算買東西, 這些例牌行程, 龍剛導遊都是來報到一下. 但三少本著試下無壞無損失的心態, 挑了隻黃寶石介指叫我試, 試落又幾靚喎, 個款又夠時髦(三少好有taste好有眼光架, 睇佢揀我就知啦), 計落有少少貴, 但係三少超級錫我, 就買左俾我(多謝三少). heehee, 唔知係咪黃寶石真係招財, 一返香港, 股市又升番, 追番晒上星期五跌市條數. 希望隻介指繼續旺我地, 下次有本錢買過隻大d架啦.